Ang Pagpapasikat at Pamimintas

Sobrang nakakainis ang mga tao na bukod sa mahilig na magpasikat ay magaling pa mamintas ng kapwa.

Ok na sana yung magpasikat na lang pero yung pamimintas ay mahirap talaga palampasin lalo na kung ako yung pinipintasan. Ok sige maganda o pogi ka na kung iyon ang gusto mo palabasin pero sana hwag mo na ipamukha sa akin at sa ibang tao na pangit ako.

O kung may bago kang gamit or gadget, cellphone or digital camera na mamahalin, high tech at maganda sana ipagyabang mo na lang pero huwag mo na ikumpara doon sa nakayanan kong bilhin. Huwag mo na sana sabihin pa na mahinang klase yung nabili ko at walang tibay na maaasahan. Ok lang na sabihin mo iyon kung hiningi ko ang opinyon at palagay mo, otherwise, talagang namimintas ka na lang.

Ang hirap naman kasi sa iba, ang gusto nila ay sila lang ang nakakapagyabang. Pag may bagong gamit ay halos i-demo na nila ito sa mga kakilala at kasamahan. Tapos pag yung iba na ang nagyayabang ni hindi man lang pinapansin nung mga taong mas mayayabang pa. 

Make no mistake, hindi ako nagmamalinis. May kayabangan din ako kung minsan pero hindi ko gawain na mamintas at manghamak ng tao lalo na kung walang atraso sa akin. Kung meron man ako nasagasaan at napintasan hindi ko iyon sinadya at humihingi ako ng paumanhin pag na realize ko ang kamalian ko.

Kaya yung mga pasikat diyan, ingat lang sa pagyayabang at baka nahahaluan na ng pamimintas ang mga sinasabi nyo. At kung may tinatamaan man sa message kong ito, sorry na lang pero marahil ay guilty lang kayo.

Alam ba ng mga Pangit?

Huwag naman sana ma offend ang mga makakabasa pero isang seryoso at honest na tanong lang: alam kaya ng mga pangit na sila ay pangit?

Alam at tanggap kaya nila ang kanilang kalagayan o sa kanilang mga sariling paningin ay magaganda o mga guwapo sila? At kung alam man nila, ano kaya ang pakiramdam nila? Naiilang at nahihiya ba sila o bale wala lang sa kanila ito?

Gusto ko sana mag interview pero hindi magiging maganda ang dating ko at mababastos ko lang sila. Hindi ko naman pwede tanungin ang sarili ko dahil sa aking palagay ay hindi naman ako pangit.

Pero sa palagay ko lang naman iyon at maaaring hindi naman ganon ang tingin ng ibang tao sa akin. Malay ko, baka para sa iba ay pangit din ako. At ito na nga mismo ang gusto ko sana masagot. Kahit kasi sa pag-uugali kung minsan yun inaakala nating tama ay mali pala sa iba. Akala natin minsan ay matuwid tayo pero baluktot pala ang ating katuwiran sa tingin ng ibang tao.

Siguro ay mas mabuti na lang na ating ipalagay na wala talagang pangit na tao at wala rin sigurong maganda. Ang kagandahan at kapangitan ay isang bagay na nababatay sa palagay o pananaw ng nakakakita.

Isa pa, hindi dapat mapako ang ating mga paningin sa kagandahan lalo pa kung panlabas lang ito. E ano naman kung pangit ako at guwapo ka? E ano naman kung guwapo ako at pangit ka? Hindi ba mawawala din ang pagkakaiba balang araw?

Kaya yung magaganda diyan sana huwag nyo apihin ang mga pangit. At yun naman mga pangit diyan sana huwag nyo kainggitan at kasuklaman ang magaganda. Lahat ng tao, pangit man o maganda, ay may kanya-kanyang bahagi at papel sa buhay at mundo nating ito.

Ating tandaan: Beauty is in the eyes of the beholder.